Plantun de Prouvènço

Pèr coumpara dos planto d'encò nostre

Delphinium ajacis & Typha domingensis

Flour-de-l'amour

Delphinium ajacis

Ranunculaceae

Àutri noum : Flour-d'amour, Capouchin, Flour-de-capouchin, Guihèume.

Noms en français : Dauphinelle cultivée, Dauphinelle d'Ajax.

Descripcioun :
Poulido planto que fai à l'óurigino de flour bluio mai que se pòu trouba en rose o blanc. Es en generau ramificado e se recounèis subretout à si fueio proun divisado en tros prim. S'istavo, à passa tèms en Prouvènço dins li champ de blad, à l'ouro d'aro, èi subretout li formo ourtouliero que se rescontron.

Usanço :
La flour-de-l'amour es uno planto proun empouisounanto, subretout li grano, que caup d'alcalouïdo. Ei poussible de se n'en servi pèr tua li pesou. Parèis que li Cherokee la prenien, en tisano, pèr sougna li mau de cor.

Port : Grando erbo
Taio : 20 à 80 cm
Fueio : alterno
Tipe bioulougico : Teroufite
Cicle bioulougico : Planto de l'an

Gènre : Delphinium
Famiho : Ranunculaceae

Ordre : Ranunculales

Coulour de la flour : Bluio
Petalo : irreguliero
Ø (o loungour) flour : Pancaro entresigna
Flourido : Estiéu

Sòu : Ca
Autour basso e auto : 0 à 1200 m
Aparado : Noun

Liò : Escoumbre e proche dis oustau - Champ
Estànci : Mesoumediterran à Mesoumediterran
Couroulougi : Eurimediterrano
Ref. sc. : Delphinium ajacis L., 1753 (= Consolida ajacis (L.) Schur, 1853 )

Paviho-rousso

Typha domingensis

Typhaceae

Àutri noum : Fielouso, Filouso, Masseto, Cire, Sagno.

Nom en français : Massette australe.

Descripcioun :
Coume tóuti li Typha, la paviho-rousso se recounèis à sis espigo femello e masclo. N'i'a cinq meno de Typha ; aquelo se destrìo, de segur de la coulour de l'espigo femello, rousso, mai peréu de si fueio pas trop largo e en mié-ciéucle en coupo, e tambèn de la loungour de separacioun entre li dos espigo (2 cm). Li fueio an d' auriheto gaire redouno au contro de T. angustifolia (vèire lou dessin).

Usanço :
Li fueio de paviho podon èstre utilisado pèr lou sagnage di cadiero e li flour pèr rempli li matalas. Se saup mens que li brout soun manjadis coume d'espargo. Se pòu faire de farino emé li racino e uno meno de pan emé l'agriero.